A cea das enaguas

Todo comeza un día festivo cando Eloi vai á súa vila a visitar seu avó, Matías. O que non sabe é que nesa mesma vila hai numerosos segredos que el descoñece por completo. A súa curiosidade e afán de saber a verdade levarán a Eloi e á súa familia materna enteira a un camino sen retorno cara a súa verdadeira orixe.

O libro podería clasificarse dentro do xénero de libros costumistas, reflectindo a vida cotiá dunha vila que pouco a pouco vai perdendo habitantes ata o punto de quedar baleira. Caracterízase polos continuos saltos temporais nos que se van descubrindo segredos ata entón descoñecidos para o lector e para a meirande parte do resto dos personaxes. Pese a que ás veces hai partes que poden resultar un tanto monótonas, An Alfaya sabe como manter o lector dentro da historia, coa constante intriga de saber o desenlace, e coa aparición repentina de novas situacións que alterarán por completo o transcurso dos feitos.

En xeral, na miña opinión, a novela é bastante fácil de ler e moi amena. Mantén a intriga cada intre, e podes ler case oitenta páxinas sen percatarte delo. Totalmente recomendable para amantes da lectura e para os que non tamén, pois como xa dixen, é sinxelo de ler e ten unha trama entretida.